As caras dos nenos xa o din todo!
martes, 30 de setembro de 2014
ANTÍA, WAMBA e o regato pequeno.
O pasado mércores 24 de setembro tivemos a oportunidade de gozar co teatro
en galego na nosa escola. Visitounos a Tropa de Trapo e representaron a obra Antía, Wamba e o regato pequeno. Os
protagonistas eran Antía, unha nena pequena cun bocadillo xigante, e Wamba, un
rapaz do Congo que traballaba vendendo cousas no topmanta. Despois dun fortuíto choque polas rúas da súa cidade
chegaron a un acordo e Antía compartiu con Wamba ese xigante bocadillo a cambio
das historias que Wamba lle contou.
E foron historias cheas de mensaxes importantes que nos ensinan que se
todos pomos algo da nosa parte podemos facer un mundo moito mellor, fixéronnos
reflexionar sobre todo iso do que temos de máis e do que precisamos, de
compartir dende o corazón, de valorar o que realmente importa… Porque os protagonistas
das historias de Wamba foran quen de substituír conflitos por festas na selva;
desbaratar os plans de facer edificios nun parque onde xogaban os nenos; facer
entender que compartir non é dar o que nós non queremos e de comprender que,
moitas veces, o que parecía unha maldición non é máis que unha valiosa lección.
Ademais de escoitar puidemos bailar, cantar e incluso actuar, no escenario
e dende as nosas butacas; a verdade é que foi unha auténtica experiencia na que
nos divertimos e aprendemos, que máis se pode pedir?
E agora queremos darlle as grazas á Tropa de Trapo e ao Fondo Galego de
Cooperación e Solidariedade por ternos ofrecido este súper espectáculo e ao
cole por acollelos e permitirnos gozar con el.
Aquí vos queda un enlace con máis información para todos aqueles que aínda
non tiveron a sorte de velo:
http://tropadetrapo.blogaliza.org/espectaculos/antia-wamba-e-o-regato-pequeno/
domingo, 14 de setembro de 2014
Subscribirse a:
Publicacións (Atom)