domingo, 25 de febreiro de 2018

VISITA DE LEDICIA COSTAS



Ledicia Costas, autora de O Corazón de Xúpiter, estivo no noso centro o pasado martes vinte de febreiro para falar co alumnado do seu libro. Este agocha unha crítica ó mal uso das redes sociais velado baixo a historia dunha adolescente, apaixonada das estrelas, que cre atopar a alguén con quen falar na rede e de quen se namora. A través do desenlace da novela, Ledicia lanza unha advertencia, un retrato verídico que fai da sociedade e que plasma, dende os ollos inocentes da protagonista, os trazos de realidade que o seu público tratou durante a charla.

                Noelia Gallego (4º ESOB)








xoves, 22 de febreiro de 2018

CONCURSO EDITORIAL GALAXIA

A Editorial Galaxia lanza o seu segundo Reto Lector para fomentar a lectura en galego entre os adolescentes

Enviando dous vídeos nos que comenten obras da editorial as mozas e mozos poden gañar un Ipad de última xeración


A Editorial Galaxia lanza estes días a segunda edición do seu Reto Lector destinado a fomentar a lectura entre os máis novos. Despois do éxito da primeira convocatoria en marzo de 2017, na que con apenas dous meses de prazo para participar se recibiron 35 vídeos enviados por rapazas e rapaces de toda Galicia, Galaxia persiste no seu empeño en conseguir que a mocidade se achegue ao sistema literario integrándose nel como críticos, lectores...
Nesta segunda edición, poderán presentarse ao premio as rapazas e os rapaces de entre 12 e 16 anos. Para participar, só terán que enviar ao enderezo electrónicogalaxia@editorialgalaxia.gal dous vídeos nos que se dea conta da lectura de dous libros da Editorial Galaxia de calquera das súas coleccións de narrativa para todas as idades: Árbore, Costa Oeste e Literaria. Os vídeos non poderán exceder os dous minutos de duración.
Durante eses dous minutos, os participantes deben comentar o contido da obra, os aspectos que máis lles gustaron e as razóns polas que recomendarían a súa lectura. O xurado estará composto polo alumnado da ESO dun centro galego designado pola editorial, e será quen valore todas as propostas fixándose principalmente no poder de persuasión dos participantes, na súa claridade expositiva e na creatividade da gravación.
A rapaza ou rapaz gañador recibirá un Ipad de última xeración. Ademais, haberá cinco lotes de libros coas últimas novidades da Editorial para os cinco seguintes clasificados. O prazo de entrega dos vídeos estará aberto ata o día 27 de abril, e o fallo do xurado farase público no mes de maio.
A través desta iniciativa, a Editorial Galaxia pretende fomentar a lectura en galego nun sector clave da nosa sociedade: os adolescentes. Para facelo, proponlles aos participantes que tiren rendemento das ferramentas dixitais e do seu potencial como medios de transmisión e difusión lingüística e cultural, ao tempo que os anima a desenvolver o seu sentido crítico, mellorar a súa competencia oral e aprender a ver na literatura unha canle comunicativa.

Materiais para descarga:
 Bases
Agradeceríamos a súa difusión. Se necesitades máis información non dubidedes en contactar.

xoves, 15 de febreiro de 2018

"A derradeira lección do mestre" verase en Galicia por primeira vez


A derradeira lección do mestreun dos cadros máis simbólicos de Castelao, viaxará por primeira vez a Galicia. O óleo, que na actualidade se atopa no Centro Galicia de Bos Aires, formará parte dunha mostra sobre o artista e intelectual galeguista que se celebrará no Museo Centro Gaiás no último trimestre deste ano. Segundo anunciou onte a Xunta, a Consellería de Cultura chegou a un acordo para que A derradeira lección do mestre, que nunca saíu da Arxentina, poida exhibirse en Galicia. Esta cesión materializarase nun convenio que está previsto que sexa asinado neste mes de febreiro. Entrementres, xa se traballa na concreción das condicións técnicas do préstamo, para garantir a seguridade e profesionalidade do difícil traslado dunha obra destas características.


Castelao pintou este cadro no ano 1945 na Arxentina, onde se exiliara definitivamente despois da Guerra Civil. A sublevación de 1936 colleuno en Madrid, onde traballou para o goberno da República, tarefa que desempeñaría ao ano seguinte en Valencia. Foi aquí onde debuxou os dous primeiros álbums da guerra, Atila en Galicia e Galicia mártir. A este último pertence a estampa A derradeira lección do mestre, que máis tarde recrearía en óleo en Bos Aires. Castelao inspírase nun motivo clásico da historia da pintura, a do lamento ante o corpo de Cristo, transformado aquí no mestre asasinado e convertido en mártir polo bando fascista; no seu caso, son dous rapaciños os que amosan a súa dor ante o cadáver de quen foi o seu mestre.

                                                                    La voz de Galicia